得西九，得天下？ 林鄭不能當特首

　　西九龍填海區係香港嘅規劃奇蹟。呢笪地見證咗香港回歸之後點樣充份發揮「長官意志、為所欲為」，直情係將呢樣嘢推向極致。 

　　先有佐敦對開嘅一部分西九，有全球最貴、一度陷入爛尾恐慌嘅高鐵地盤。呢個使咗近千億嘅地盤，充份反映政府為咗融合中港，一往無前嘅魄力，即使明知真實成效未必係咁大，而且會蝕到入肉，都仍然要推到底。

　　高鐵地盤隔離，就係一條岸邊嘅長廊。喺十幾年前，當時高鐵都未決定要興建，我仲係求學時期，當時曾經去科學館睇過政府有關呢一條岸邊長廊嘅規劃展覽，當時政府話，想將呢一塊土地，打造成為世界級嘅表演場地，匯萃全世界嘅文化藝術高手，嚟到香港嘅「西九文化區」，喺天幕下jam下歌、寫下生、影下相。

　　係呀，冇錯呀，當時仲話要起天幕架，仲擺咗幾款得獎設計出嚟，諮詢大家邊款靚啲。當時我對呢個文化區係有啲好美好嘅遐想，畢竟都係一個鍾意文字嘅人，對政府終於有心搞文化藝術，係有種「少懷安慰」嘅感覺。

　　不過，整個比賽就好似一個畫畫比賽咁，純粹停留喺藝術層面，冇實行到出嚟。時至今日，西九「文化」區開放咗個大草地，擺過吓展覽，有個「自由約」俾大家喺有限嘅自由之下賣吓嘢睇吓嘢，暫時都無寸進。

　　林鄭見到咁，當然要諗啲嘢去起啦，就索性同故宮合作，喺董事局秘密咁通過放棄興建大表演場館，換個博物館俾大家，唔諮詢啦，俾個驚喜大家，故宮喎，大家一定鍾意嘅！

　　諗落，林鄭奶媽嘅心態，的確係好似一個媽媽咁架，幫個仔買咗件夏威夷風情嘅新衫，丟咗件日本絕版舊衫，你返到屋企大鬧，「你做乜丟咗我件衫！」奶媽就出聲啦：「呀仔……我想俾個驚喜你……」你有冇見過媽媽幫個仔買衫會問定個仔？好多時都係返到屋企先知已成定局架啦。林鄭咁顧家喎，實係用呢種心態去看待大家！大家唔好鬧林鄭啦喎！

　　只不過，媽媽同林鄭係有唔同。

　　媽媽係無私地愛呢個家庭，佢見到件衫，真係覺得靚，佢就會買俾個仔，希望佢返嚟係會開心笑一笑，日日著住件衫。

 　　林鄭呢，佢除咗係奶媽，亦係西九文化區嘅主席，而佢正在考慮選特首。意味住，佢買咗呢件衫，間舖頭可能有著數俾返佢，唔係媽媽儲嗰啲印花呀積分呀呢啲著數，而係佢可能買粒糖贏間廠嗰種著數。

　　西九佢話事，所以，點解佢甘於冒香港民情嘅大不諱，甚至令政府有機會犯上西九管理條例，都唔去做任何諮詢，秘密同北京達成呢個割地協議。

　　當故宮博物館拍板興建嘅消息公開後，林鄭話，唔公開諮詢係因為呢件事直接涉及中央，如果喺過程中有人表示唔同意嘅話，會令情況好尷尬。呢個係港府官員首次將「尷尬」連繫到諮詢，意味以後事關北大人嘅嘢，佢處理上都會先顧北京面子，點解反對呀？尷尬喎，面紅喎，薄皮喎！唔好問啲人啦，做啦！ 

　　呢種意識嘅延伸，就表現喺張建宗對待全民退保諮詢嘅態度，接受到嘅諮詢大部分係贊成無資產審查方案，但張建宗會話，噢，呢一批意見絕大部分係按照幾種template架咋，即係重覆嘅意見，所以唔能夠作準架。咁贊同政府立場、贊同有資產審查嘅意見呢？點解張建宗唔講呢？難道全部都係獨立、冇重覆嘅意見？

　　無可否認，諮詢成為民意戰嘅平台，有唔少人會寫好一啲樣式嘅信件，呼籲贊同自己立場嘅人一齊向政府發表意見書。但最後得出個數字，其實都係有實質意義，反映到關注呢件事嘅市民，大概嘅民意分野係點。政府唔能夠以此為原因蔑視。

　　而呢種意識係相當危險，尤其是林鄭好有可能會選特首。我哋點樣信任一個顧北京面唔面紅，但唔顧香港人意願嘅人，可以做到真正嘅中港橋樑？你，點樣信呢一個可能比689更689嘅人，會為你我利益出發？